الرئيسية » مقالات » مقالات وحكايات ماما “زوزو ” .. بناء العالم
د/ زينب زكى

مقالات وحكايات ماما “زوزو ” .. بناء العالم

بقلم دكتورة / زينب زكى
إذا أعددت بناء الإنسان أعدت بناء العالم 
كان يا ما كان يا سعد يا إكرام ما يحلى الكلام إالا بذكر النبى عليه الصلاة والسلام
كان فيه زمان زمان ولد شقى لكن ذكى واسمه سمير وكمان كان فيه بابا زكى الذكى .. إيه اللى حصل ؟؟؟؟ تعالوا نشوف …..
فى يوم من الأيام بابا زكى كان قاعد فى أمان ماسك جرناله .. وبيشرب قهوته من فنجانه وفى وسط هدوء وسلام قعد سمير قدامه يتكلم ويحكى فى حاجات كتير .. وبابا عاوز يركز فى اللى قدامه ومش مستعد يسمع ولا يتكلم معاه ومش عارف يقوله إزاى إنه مشغول ومش فاضى ..
وبسرعة بابا فكر وقرر يقوله على حاجة يعملها تاخد منه وقت شوية يكون فى الوقت دا خلص قراية لجرناله ..
بابا قطع ورقة من الجرنال وكان فيها خريطة العالم كله .. وجاب مقص وقطعها لقطع صغيرة وأعطاها ل سمير وقاله .. تقدر ترتب خريطة العالم وترجعها زى ما كانت بترتيبها السليم ؟؟؟ !!!
وافق سمير على طلب بابا زكى وأخد قصاصات الورق وبعد دقائق معدودة رتبها ولزقها ورجعها زى الأول بالظبط .. !!!
بابا استغرب وقاله للدرجة دى إنت شاطر فى الجغرافيا وقدرت ترتب العالم بالسرعة دى ؟؟؟ !!!
رد عليه سمير وقاله ببراءة .. كان على ظهر الورقة صورة .. إانسان لما أعدت ترتيبه قدرت أعيد ترتيب الخريطة
وهنا بابا فهم الحكمة الرائعة من ابنه الجميل سمير
إن إعادة بناء العالم يرجع فى المقام الأول لإعادة ترتيب الانسان
وتوتة توتة خلصت الحدوتة
ماما زوزو

عن زكريا المختار

اضف رد